தூக்கத்தை கைவிடாதீர்கள்..!

தூக்கம் பற்றி ஏராளமான ஆய்வுகள் வந்திருக்கின்றன. அந்த வகையில் இன்னொரு ஆய்வு இது. கலிபோர்னியா பல்கலைகழகத்தை சேர்ந்த பெண் பேராசிரியர் மெட்னிக் தலைமையில் சில ஆராய்ச்சியாளர்கள் தூக்கத்தினால் கிடைக்கும் பலன்கள் குறித்த ஆய்வை நடத்தினர். 

இந்த ஆய்வுக்காக ஆண்கள், பெண்கள் என்று 77 பேர் தேர்வு செய்யப்பட்டனர். இவர்கள் அனைவருமே நடுத்தர வயது உடையவர்கள். இவர்களிடம் மூன்று வார்த்தைகள் கொண்ட சீட்டுக்கள் கொடுக்கப்பட்டன. பிஸ்கட், இதயம், பதினாறு என்பது போன்ற வார்த்தைகள் அவற்றில் இருந்தன. 

இந்த மூன்று வார்த்தைகளுக்கும் பொருத்தமான இன்னொரு வார்த்தையை அவர்கள் கொடுக்க வேண்டும். உதாரணமாக மேலே சொல்லப்பட்ட பிஸ்கட், இதயம், பதினாறு போன்ற வார்த்தைகளுக்கு பொருத்தமான வார்த்தையாக 'இனிப்பு' என்ற சொல் இருக்கும். இது போன்று ஒவ்வொரு 3 வார்த்தைக்கும்  அதற்கு பொருத்தமான இன்னொரு வார்த்தையை தெரிவிக்க வேண்டும். 

முதல்கட்டமாக எல்லோருக்கும் இந்த வார்த்தைகள் கொடுக்கப்பட்டன. அதற்குரிய பொருத்தமான மற்ற வார்த்தைகளும் அவர்களிடம் இருந்து எழுதி வாங்கப்பட்டன. இந்த ஆய்வின் போது சிலருக்கு சிறு தூக்கம் போட அனுமதி அளிக்கப்பட்டது. 

அவர்களின் தூக்கம் எப்படிப்பட்ட தூக்கம்? ஆழ்ந்த தூக்கமா? கனவு காணும் தூக்கமா? தூங்குபவர்களின் மூளை இயக்கம் எப்படி இருக்கிறது? என்பதைக் கண்டறியும் கருவிகளும் வைக்கப்பட்டிருந்தன. தூக்கத்திற்கு பிறகு மீண்டும் அதே 3 வார்த்தைகளையும், மேலும் சில புதிய மூன்று வார்த்தைகளையும் ஆராய்ச்சியாளர்கள் கொடுத்து அவற்றுக்கு பொருத்தமான இன்னொரு வார்த்தையை சொல்லச் சொன்னார்கள். 

அப்போது அவர்கள் முதலில் சொன்ன பொருத்தமான வார்த்தைகளை காட்டிலும் மேலும் பொருத்தமான வார்த்தைகளை சொன்னார்கள். குறிப்பாக கனவு காணும் நிலையில் தூங்கியவர்கள் அதைவிட மிக மிகப் பொருத்தமான வார்த்தைகளை சொன்னார்கள். 

எனவே நல்ல தூக்கம் என்பது சிறந்த கற்பனை வளத்தையும் சிந்தனை திறனையும் கொடுக்கும். கனவு காணும் வகையில் தூங்கியவர்களுக்கு இதைவிட அதிகமான கற்பனை வளமும், சிந்திக்கும் ஆற்றலும் இருக்கிறது என்று ஆய்வாளர்கள் முடிவு செய்தனர். எனவே நன்றாக தூங்குவது மிக மிக முக்கியம்.

தூங்குங்கள்..! கனவு காணுங்கள்..! கற்பனை வானில் சிறகு விரித்து பறந்து செல்லுங்கள்..! எந்த நிலையிலும் தூக்கத்தை கைவிடாதீர்கள்..!